Posted by: White Knight | Saturday, 22 May, 2010

Trek – Deel 3

Dagsê Kuiergaste van die hawe,  mense en ander spesies.😉

Ons kyk nog steeds na die onderwerp van Trek hier by die Veilige Hawe. Juis omdat ek nie net oor die vervelige onderwerp van pak op, trek en pak weer uit, as die hoofdoel van die skrywes beplan het nie. Wag ek praat nou nie die waarheid nie, ek het. Toe die gedagte om weer iets te skryf begin het was ek geheel ontnugter met myself toe die onderwerp van trek as die hooftema begin posvat het. Maar hoe meer tyd verloop het ek die onderwerp agter die skrywe meer en meer vir myself begin redeneer en verstaan.

Die redes hoekom mense fisies wil verhuis of dan nou die proses van trek aanpak is legio. Sou jy egter mooi aan die lewe dink “trek” ons nie net fisies van een adres na ‘n ander in ons lewens nie. Ons trek emosioneel, geestelik en natuurlik fisies op meer as een manier en om verskeie redes in ons alledaagse lewens.

Die redes wat aanleiding gee tot jou reis deur die lewe is so verskillend en uiteenlopend dat mens seker boeke kan skryf daaroor. As jy opstaan in die oggend en alles is reg, dan beweeg jy deur die dag wat voorlê baie makliker as iemand wat se dag aan die spreekwoordelike verkeerde kant van die bed begin het. Dink maar daaraan, jy word wakker en die krag is af, of jou voete wat met afwagting van die bed neerdaal na die mat word met yskoue water begroet omdat die warm waterstelsel deur die nag ‘n trek na die ashoop begin het.

Jou dag gaan baie beslis nie soos ‘n sprokie in kammaland verloop as dit eers op daardie noot begin het nie. Eerder ‘n Friday the 13th met jou as al die hoofkarakters wat moet vlug vir hul lewens voor die lem van ‘n kragsaag. Die hele tyd wat jy met die versekering, sou jy dit onthou het, worstel oor die vervanging van en herstel van bykomende skade gaan jou dae nie noodwendig reg verloop nie. Dus word jou geordende lewenswyse en sekuriteit van ‘n veilige huis onverwags gekaap en jy “trek” ter selfde tyd deur ‘n magdom emosies wat op en af en heen en weer jaag.

Enige persoon wat ‘n buitengewone of traumatiese ervaring beleef, reageer anders as normaal en indien die omstanders, soos vriende, familie of kollegas dit nie weet en verstaan nie kan dit tot onnodige bykomende trauma en konflik lei wat net later ook nog herstel moet word. Emosionele wonde kan jy egter nie met Gips board of Polyfiller toesmeer, afskuur en oorverf nie.

Die graad van emosionele wipplank wat elke persoon se emosies tydens so “geforseerde trek” deurmaak hang natuurlik ook af van baie ander faktore soos, die impak van die gebeure op hulle lewens, kort of langtermyn. Iemand wie se lewens maat vir ‘n kort rukkie weggaan vir werk, verskil geheel van ‘n ander wat deur ‘n egskeiding of afsterwe van ‘n geliefde gaan.

Die persoon se eie perspektief oor die situasie, agtergrond en opvoeding, asook persoonlike ervarings en vorige soortgelyke trauma wat beleef is of ook die totale afwesigheid daarvan. Nie almal van ons het al die harde werklikheid van lewe beleef as ons die dag begin werk en sogenaamd groot is nie. Baie mense word groot in Lala land, waar nooit enige slegte dinge gebeur nie en die goeie altyd oorwin. Die werklikheid is egter baie ver verwyder van dit. Die goeie oorwin nie altyd nie, juis oor hulle nooit geleer het om “ vuil te speel en onderduims” te wees nie.

Die gebeur of ons dit nou wil weet of nie. Niemand kan oorleef deur soos die Bere en slange te hiberneer elke keer as die koue naderkom en die riviere begin vries nie. Juis omdat die wêreld nie gaan stilstaan nie sal die redes vir jou emosionele trek sessie nie ophou nie en moet mens eerder voorberei vir dit en seker maak jy trek nie soos Skillie jou kop in ‘n dop in nie. Sodra jy jou kop uitsteek het jy nog groter probleme.

Alle mense se lewens is anders, hulle persoonlikhede verskil, maar die kontak en konflik sal nooit ophou nie. Sodra jy egter jouself eerstens en dan ander beter verstaan kan jy die pad met meer vertroue stap. Sodra daar dan ‘n “trek” situasie ontstaan kan jy dit hanteer met die minste moontlike skade vir jouself en ander rondom jou.

Wanneer jy egter die ou idees van tyd genees alle wonde glo en beoefen sal jy gou genoeg agterkom dat tyd wag vir niks en niemand en wonder het ‘n manier om hul rowe op die mees onverwagte tye te verloor. Dis wonde nie volkome genees nie, wat weer en weer bloei, soveel dat hulle later nie eers meer rowe vorm nie en selfs smetterig raak.

Wonde wat die “trek” na dorre onvergewensgesinde woestyn ‘n realiteit maak, dorre waterlose plekke waar geen liefde of genade ooit kan of wil vloei nie……………😦😥

Vrede, vreugde, liefde en groete word vir elke Huis, Paleis, Pondok en Varkhok. toegewens.🙄😆

White Knight
Posted by: White Knight | Wednesday, 12 May, 2010

Trek – Deel 2

Dagsê Kuiergaste van die hawe,  mense en ander spesies.😉

Die vorige skrywe het ek genoem dat trek om verskeie redes gedoen word en die lys van redes op sig self is oneindig. Maar sodra die mens of mense betrokke besluit het dat trek die enigste oplossing of onafwendbaar is, dan is die waarnatoe en hoe ook natuurlik groot faktore wat aangespreek moet word.

Gaan ons groter of kleiner, is dit permanent of tydelik. Dan word die hoe ons trek ook in berekening gebring. Doen dit self sukkel baie metode, of die kry professionele mense en hoop hulle is regtig wat daar gesê word. Anders kan die “professionele” mense later sorg vir groot stress en baie skade. Veral as jou trek Pofadder toe “per ongeluk” in Perth op eindig.

Trek jy “permanent” dan is dit meer eenvoudig. Jy pak, trek en pak weer uit. Bygesê as jy vooraf klaar besluit het wat trek saam en watter word van ontslae geraak voor die tyd. Dir tydelike trek laat natuurlik toe dat net die noodsaaklike dinge uit gepak word die res moet gestoor word om weer ‘n in pakkery vry te spring later. Die werklikheid is dat alles wat voor die trek as onbelangrik gesien, gewoonlik ook uitgepak moet word  omdat die omstandighede hulle gebruik nou noodsaaklik maak.

Party mense trek natuurlik so baie keer permanent, dat enige voertuig met ‘n sleepwa wat die erf binne ry dan gaan le die hoenders al reg sodat die pote vasgebind kan word. Dis nou as jy soos met die ossewa tye die hoenders onderaan vasmaak.🙄

In die verre verlede was die mense mos baie meer behulpsaam en het jou vriende en familie, vrywillig en sommige verplig, gehelp met die pak en trek solank jy net nie na ‘n ander provinsie toe trek nie. Selfs by die bestemming het die nuwe bure reeds reg gestaan met eet en drink goed asook hand bygesit met die aflaai en wegpak. Jy was sommer gou vertel waar al die “regte” winkels en dienste geleë is. Natuurlik in die proses ook seker gemaak jy kerk reg. Geen vreemde sektes en ideologieë nie, jy moet verstaan hulle is ordentlike mense op daai dorp. Hierdie onding van vroue wat langbroeke dra, nee wat hulle koppe het dadelik daarvoor geskud.😯

Uiteindelik is alles weer in plek en kan die normale huis roetine weer gevolg word. Nuwe omgewing, mense en omstandighede, dalk in party gevalle nog ‘n nuwe taal ook sou die trek iets insluit wat na immigreer klink. Wel trek van die Ou Transvaal na die Kaap was destyds erger as vandag se immigreer oorsee, heng jy stop skaars daar dan wil hulle ‘n ordentlike Blou Bul oortuig die WeePee is ook ‘n goeie rugby span.😆

Die lewe staan nie stil vir niemand nie en wat ook al jou rede vir trek sou wees, by jou bestemming is daar ook karakters en dinge, net vreemd aan die begin, maar soos julle vorder sal jy sien, Koos, Karel, Sarel, Marie, Martie en Marietjie het nou net ‘n ander vorm en voorkoms, maar hulle het vir jou gewag om weer soos voorheen aan te gaan of van nuuts af dinge te leer en ontdek………..

Vrede, vreugde, liefde en groete word vir elke Huis, Paleis, Pondok en Varkhok. toegewens.😉

White Knight

Posted by: White Knight | Friday, 7 May, 2010

Trek – Deel 1

Dagsê Kuiergaste van die hawe,  mense en ander spesies. :wink:

Trek is ‘n vier letter woord, maar nie op sig self ‘n vloekwoord nie. Dit skep net as gevolg van al die bydraende faktore soms ander vier letter woorde se gebruik. My ouers het altyd gesê: Klein woordjie baie werk. Dis reëlings, beplanning, inpak, vervoer van goedere en lewendehawe, uitpak en weer van voor af orde kry. As orde kry ‘n werklikheid is.

Trek is dieselfde vir sommige mense as om ‘n boom te ontwortel en weer te plant op ‘n ander meer geskikte plek. Gebruik die nodige kennis en toerusting en siedaar dit verloop seepglad. Vir sommige mense is trek egter so traumaties dat hulle nooit weer georden raak nie. Ander sal eerder getrek raak, nie met ‘n vragmotor nie, as om te verhuis. Hulle kan maar net nie die proses korrek hanteer nie en dit eindig dan eerder in die spreekwoordelike vernietiging van die boom.

Besluite om te trek word nie ligtelik geneem nie. Die redes vir trek is legio nes die bestemming en doel daarvan. Sommige wil net uit die buurt of dorp wegkom. Ander wil weer opgradeer, jy weet mos die geld brand en dan moet daar vooruit beplan word vir die kinders se koms. Dit sal natuurlik eers oor nege jaar en nie nege maande wees nie, jy moet verstaan hulle wil eers die loopbane vestig en alle moet reg wees voor die kinders kom. Wel net so terloops, niks is ooit reg as die kinders eers daar is nie, verstaan dit en hanteer dit, hoe gouer hoe beter.

Die bure en die buurt maak my mal of laat jou onveilig voel. Dis korrek ja, trek na een van daai banggat dorpies wat hulle “Security villages or complexes” noem. Jy is daar nog meer onder ‘n valse indruk van veiligheid as elders. Daai plekke werk net as almal saamstaan en hul eie en ander se sekuriteit verdedig en verseker.

Dan weer is die omgekeerde reaksie as die kinders weg is: “Die huis is nou te groot ons moet afskaal”. Dit nadat julle besluit het om net een kind te he sodat hy/sy nie enige tekorte het nie en alles kan bied wat nodig is. Korrek ja, maar waar gaan julle met al die versamelinge en afgode heen. Daai dinge wat so oor die jare sorgvuldig bymekaar gemaak is en geen vervangings waarde het nie?

Redes is daar altyd vir trek, werk, omstandighede, persoonlike voor en afkeure selfs geite en giere. Maar een ding staan soos ‘n seer vinger in die sjokolade boks uit, aan die einde van elke maand word daar opgelaai en weer afgelaai. Geskuif, ingepak, uitgepak en weg gepak. Afgehaal, gate toegestop en geverf, as hulle ordentlik is, spykers ingekap en weer opgehang.

Dit alles net om weer te begin soek van voor af waar alles is, dit is mos sorteer en netjies weggepak elke dingetjies op sy plek. Of nie………….?

Vrede, vreugde, liefde en groete word vir elke Huis, Paleis, Pondok en Varkhok. toegewens. :wink:

White Knight

Older Posts »

Categories